Жаңа нысан жақсы нышан

Жаңа нысан жақсы нышан

 

Аудан әкімі Александр Бабенко өзінің ауылдық округі бойынша жүргізген жұмыс сапарында бірнеше объектілерге бас сұғып, әлі ресми ашылуы болмаса да, дайындық үстіндегі кәсіпорындардың жұмыс барысын бақылап көрді. Жуық арада аудан өз пастерленген сүтін, майы мен ірімшігін шығаратын болады. Бастама жаман емес.

 Мичурин ауылында «ВЕКТОР-S» ЖШС сүт зауыты өнім шығаруға әбден дайын көрінеді. Өндіріске қажетті барлық құрылғылармен жабдықталып, тіпті санитарлық қызметтің тексерісінен де өтіп қойған. Жоспарда: сүт өнімін тәулігіне 10 тоннаға дейін шығару. Бұл басы ғана дейді мекеме басшылары. «Родная долина» ауылдық өндірістік кооперативімен де ынтымақтастық орнатқан. Оның жетекшісі Талғат Булатовтың айтуы бойынша, аталмыш ұйымның құрылғанына көп болмаса да, атқарар істердің ауқымы кең. Жергілікті жерден сүт жинау үшін Ресей мемлекетінен сүт таситын көлік сатып алынған. Кооператив төрағасы шаруа қожалықтарының басшыларын өндірістік кооперативтің ассоциацияланған мүшелігіне енуге шақырып, оған тек өтінім берсеңіздер болды, құжаттамалық жұмыстарын өз мойынымызға аламыз дейді.

Серіктестер сүт кептіру бойынша цехті де іске қосатындарын жасырмады, жұмыс қарқыны ұлғайса, екі ауысымға көшіп, жұмыс орындарының ашылатынын жеткізді. Александр Витальевич істің мән-жайына қанығып, алдағы уақыттарда сүт қабылдау бағасын нақтылауды тапсырды.

Қалаға іргелес жатқан ауданның жандануы заңды да. Күннен күнге адамдардың әл-ауқаты артып, халықтың тұрмыс деңгейі жақсаруда. Бұны жаңадан көтерілген нысандардан байқауға болады. Ал, оқу жылы аяқталысымен Черноярка орта мектебінде жөндеу жұмыстары басталып та кетіпті.  Төбе жабындысына күрделі жөндеу жүргізіліп, терезелері ауыстырылуда. Өңір басшысы Александр Витальевич пластик әйнектердің орнатылуынан кінәраттар тауып, оны жоюға нұсқама берді. «СанЖанАйс» ЖШС мердігері болса өз тарапынан барлық кемшіліктердің уақытылы жойылатынына сендірді.

Әкімнің назарына іліккен тағы бір нысан, ол «Таушкин» жеке кәсіпкердің кондитерлік өнім өндіретін цехі.

— Бүгінгі күні  бес тонна кондитерлік өнім шығарудамыз. Облыс бойынша және қалаларда өткізілетін барлық ауыл шаруашылық жәрмеңкелеріне қатысып, қалыс қалмауға тырысамыз. Біздің өнім үлкен сұраныста. Бір осал тұсымыз, барлық шикізаттың қымбаттап кетуінде болып тұр. Мен болсам, тауардың бағасын қымбаттатып, пайда табамын деп ойламаймын. Сол себепті де, өндіріс көлемін ұлғайтып, нарықтағы бәсекелестікке төтеп беруге тырысуым керек, — деген Николай Петрович тәтті-дәмдіні бес тоннадан он үш тоннаға дейін өндіруге білек сыбана кірісуге мүмкіндік сұрап отыр.

Әзірге қолбайлау боп тұрған мәселе, бұл соған қажетті жер мен трансформатордың жоқтығы екен. Егер жер телімі бөлінсе, кәсіпкер ертең-ақ Сычевка елді мекенінде аталмыш цехті іске қосуға әзір.

Жұмыс сапарының соңғы аялдамасы Луганск ауылдық округі болды. Қара жердің қадірін білетін «Луганск» өндірістік кооперативінің басшысы Петр Кузьменко аудан әкіміне егіс даласындағы, фермадағы атқарылып жатқан жұмыстарды таныстырып өтіп, тілек-назын да айтып қалды.

Жолай өндірістік кооперативінің жартылай дайын өнімдер  дайындау цехына соққан аудан әкімі мен бөлім басшыларына сол жердегі қызметкерлер қамырдан жасалған бірінші рет дайындалған котлет, тұшпара және манты тағамдарын көрсетіп, алдағы жоспарларымен бөлісті. Алда, дайын өнімді сүйіп жейтіндер үшін әлі талай дәмді тағамдар дайындау жоспарда тұр екен. Ас болсын демекпіз!

 

 

Гүлзат Мейрамова